Atharratzetik abiaturik, Mauleko bidea hartuko du; ondotik Amikuze, Hazparne eta Luhuso zeharkatuko ditu, eta berriz ere Baxenabarren sartuko da, Bidarraitik goizeko oren batean pasatzeko.

Batzuei gauaz korrika egiteak kezka sortzen badie ere, AEK-ko Maialen Errekartek alde baikor anitz azpimarratzen ditu: « Gau betean, euskararen aldeko atxikimendu sendoa duten lagunak bide bazterretan biltzen dira; eta, gainera, gaueko ilunak eta isiltasunak xarma berezia ematen diote ekimenari, Korrika barne-barnetik eta sakonkiago biziaraziz. »

Beraz, 29 kilometro Garazi-Baigorrin barna, Arnegitik Nafarroako lurraldera sartu aitzin. Lekukoa eraman nahi duten elkarteek badakite oraindik kilometroak badirela hartzeko ibilbide zati horretan.

Korrika Kulturala Garazi-Baigorrin

Korrika aitzin, Korrika Kulturaleko hitzorduez gozatzeko parada izanen da. Garazi-Baigorrin bi ekitaldi nagusi antolatu dira:

• Martxoaren 12an, zine-pote gaualdia: “Ez gera alferrik pasako” film dokumentalaren proiekzioa, eta ondotik kantaldia, Lurdes Iriondo eta Maite Idirinen kantuak eskainiko dituzte Maialen Alfarok, Maider Bexagarrek eta Naia Roblesek, Donibane Garaziko zineman.

• Martxoaren 15ean, Ortzaizen haurren besta handia antolatuko da.

Martxo hastapenean ere Korrika Ttipiak eginen dira eskualdez eskualde. Garazi-Baigorri lurraldean lau izanen dira, eta orotara 900 bat haurrek parte hartzea espero da.

Azkenik, jakin Korrikako bizkarrekoak jada salgai direla AEK Garazi-Baigorriko gau eskolan.