Baxe Nafarroako museoak badu etnografiaren partea zeinak baititu lan ezezagun anitz, bertzeak bertze harri biribilak. Hori arte-artisauek dute egiten, eta hori dute erakutsi nahi, lehentze, Donapaleuko Bideak gunean.

Hala, artisauez harago, arte-artisauen topaketa antolatu dute Donapaleuko Bideak guneak eta Euskal Hiri Elkargoak.
Funtsean, arte-artisautza titulu bat da, teknika berezi batez egiten baitute lan. Hala, Alain Zuaznabar koordinatzaileak egitarauaren berri eman digu: apirilaren 10ean, 14:00etatik aitzina izanen dira hiru arte-artisau: Sandra Luku amikuztar zare-egilea. Tailer bat animatuko du.
Bigarrenik, Isabelle Floretek beiratea erakutsiko du, tailerrean parte hartzeko parada ere izanen da.
Hirugarrenik, Nathalie Mercèrek Murano beirarekin zer egiten duen erakutsiko du: perlak eta beste. Tailer hauetan parte har lezake nahi duenak, erreserbatu behar izan gabe eta urririk.

Apirilaren 11an, berriz, lau arte-artisau izanen dira: Stéphane Larrochek mubleak arra-berritzen ditu eta tailer baten bidez norberak hori bizitzen ahalko du.
Bestalde, Magdalenak, Larrochek bezala, tapiza-arra-berritzea nola egiten duen ikusterat utziko du, bai ere tailerra animatuko.
Bi eskultorek ere parte hartuko dute arte-artesauen lehen topaketa honetan: Filagusek objektuak birziklatzen ditu eskulturak muntatuz, eta, Piarres Erdozaintzi Etxartek, harria, burdina eta egurrak nola lantzen dituen erakutsiko du, prozesu guzia.