Elimberri kantari eta musikari-bikoteak norberak bere lengoaia garraiatzen du. Baina ez edonola. Pantxix Bidart eta Primaël Montgauzi kantautoreak elkartu dituena haien lengoairen zanpaketa da. Lehena euskaraz ari da kantuz, bigarrena, berriz, okzitanieraz. Bien arteko lotura haien hizkuntzen minorizazioak egin du, nahiz eta ez diren arrunt ordezkapen-egoera berean.

Iraganari begira kantatuko dute Donapaleun, Sorgin Ehizaz, trobadoreen garaiaz... historia bakoitzak berea kontatuko du, oroitzeko nondik heldu diren, baina arazo unibertsala taula-gaineratuko dute: zanpaketarena.

Oren bat eta laurdeneko emanaldiaz gozatu nahi duenak, bi gitarra, akordeoia, melodia eta botza entzun nahi dituenak, badaki baduela hitzordua, azaroaren 15ean, Donapaleuko Bideak kulturetxean, 19:00etan.