Maiatzaren 23an izanen da Europako museoen gaua, eta karia horretara lehen aldikoz parte hartuko du Donapaleuko Bideak guneak. Iaz ez zen posible izan, obretan baitzen.

Aurten, alta, ebiakoitz arrastirian bortak zabalduko ditu: 18:00etatik 22:00etara. Hala, giro berezia sortzea dute xede: intimista. Museoa bisitatzen ahalko da, nahieran, edota gidaturik. Alta, gida batekin aritzeko, izena eman behar da turismo bulegoarekin edo Bideak gunearekin harremanetan sartu, HEMEN klikatuz. Jakin, aski jendek hala galdatuz gero, bisita gidatua euskaraz ere egin daitekeela. Ere, lekuak mugatuak dira: 20 lagun bisitaka.

Azpimarragarria da dena urririk izanen dela.

Museoa klaustroaren inguruan da; bisita hasiko da Donapaleu aipatuz Erdi Aroan eta Aro modernoan. Etxea, esku lanak, eguneroko lanak... gai anitzi buruzko aipuak eginen dira. Xedea da bisita gidatu horrek akuila ditzan bisitariak berriz jin daitezen denbora haboro hartuz bertze egun batez.

Lehen gelak Donapaleu kontatzen du Nafarroako Erresumaren baitan, bideo baten bidez, Prehistoriatik oraingo egunera arteko Donapaleuko historian murgilduko da bisitaria. Baina ez hori bakarrik, etxea zer den ikusiko dute, eta horri loturik, laborantza, esku langileak... Bukatzeko, euskal usadioak aurkeztuko dituzte, hala nola, pilota, herri kirolak...

Gaualdia bururatuko du 20:30etan joko duen Okto'pus bikoteak emanen duen kontzertuak, musika eta poesia uztartuko dituzte.