Burgaintzi dantza taldeak 50 urteko ibilbidea ospatu du urriaren 24an eta 25ean, «Dantzan bizi» ikusgarriarekin. 280 dantzari, musikari eta kantari inguruk hartu dute parte hiru emanaldietan, Airetik gela mukuru betearen aitzinean.
1976an sortu zuen Burgaintzi taldea Irigoien apezak, sortzez Ainiza Idiondokoa zenak. Euskal kultura biziaraztea eta hedatzea zuen helburu. Hastapen xumeak izan zituen taldeak: tokiko gazte batzuk jauziak ikasten ari ziren Magne Elgartekin, eta hortik abiatu zen gaur 50 urte betetzen dituen abentura.
Urteburua ospatzeko, bi emanaldi egitea zuten lehenik aurreikusia. Publikoaren eskaerari erantzunez, ordea, hirugarren bat gehitu behar izan dute. Urriaren 24an eta 25ean eskaini dituzte hiru emanaldiak, Airetik gelan, beti jendez gainezka.
Belaunaldi guziak taula gainean
280 parte-hartzaile inguruk osatu dute ikusgarria: dantzariak, musikariak eta kantariak, adin guzietakoak. Euskal Herriko dantza eta musika molde anitz landu dituzte, berrikuntza zenbait ekarriz.
Burgaintziren hastapenetatik taldean den Léon Ithurriague ere taula gainean izan da, dantza jauzitan. Biziki hunkitua agertu da, urte hauetako ibilbidea eta taldearen bilakaera gogoan. Musikarien artean, Laura Perez eta Antton Arraspinek egin lana goraipatu dute. Ekhi Lambert Irulegiko musikariak, berriz, dantza batzuentzat egin moldaketek berritasuna ekarri dute ikusgarriari. Andoni Irigoien eta Fany Duhalde dantzari eta kudeatzaileak ere pozik agertu dira emaitzarekin. Burgaintzi «familia handi bat» dela azpimarratu dute, belaunaldi batetik bestera jakintza eta zaletasuna transmititzen dakiena.
Kantua eta emozioa, 50 urteren lekuko
Kantuak ere leku berezia izan du ikusgarrian. Miren Etxart eta Chantal Erguy kantariak kontent agertu dira, Serge Labescauren zuzendaritzapean eskaini dituzten kantuekin. Momentu hunkigarrienetakoa Burgaintziren 50 urteko ibilbidea kondatzen duen kantua denek elkarrekin eman dutenean bizi izan da. Xabina Erguy da kantu horren idazlea.