Otsailaren 15ean iragan da libertimendua Donibane Garazin. Goizeko 10:00etan abiatu dira zitadelatik musikariak, zirtzilak, Garaztarrak taldeko dantzariak, Elixabet Etxandi eta Bittor Thicoipe bertsolariak, karriketan beheiti kabalkada eginez.
Merkatu estalian eman dute ondotik ikusgarria. Zirtzilek iaztik prestatzen ari ziren antzerkian, azken urteko gertakariak umorez berrartu dituzte, herriko politikari eta arduradunak kitzikatuz, matxismoa eta laborarien mobilizazioen gaiak besteak beste plazarat ekarriz. Bertsolariek ere beren ikusmoldea ekarri dute.
Jendea nasaiki bildu da, neguaren bururatzea ospatzeko eta elgarrekin libertitzeko. Bazkari eta besta giroan bururatu da eguna.