"Nire osasun mentalerako, gizarte-loturak zaindu". Lema horren haritik, Garazi-Baigorriko osasun mentalaren arloko egitura espezializatuek erabaki dute emazteen alkoholismoa hizpide hartzea. Gaualdiaren antolatzaile nagusien artean da Garazi-Baigorriko Groupe d’Entraide Mutuelle (G.E.M.) egitura.

Donibane Garazin, geltoki ondoan du egoitza GEM egiturak. Gaur egun, 30 eta 70 urte arteko 15 bat kide biltzen dira GEMen, astelehen, astearte, ostegun eta ostiraletan. Kide horiek sufrimendu psikikoa pairatzen dute, eta GEM egiturari esker isolamendutik ateratzen dira, talde baten babesean harreman berriak eraikitzen dituzte, jende berria ezagutzen dute eta denbora atsegina partekatzen dute.

Parte-hartzaileek eurek antolatzen dituzte jarduerak Maider Goikoetxea animatzaile profesionalarekin. GEM-en ez da tratamendurik eskaintzen, baina entzutea, informazioa eta orientazioa bai. Helburua da parte-hartzaileei konfiantza eta autonomia berreskuratzen laguntzea.

GEMen hainbat tailer egiten dira: eskulanak, kirola, irteerak, sukaldaritza, baratzea… eta aurten idazketa tailerrak ere bai, Fanny Robert-ekin. Tailer horietatik sortu da GEMen aldizkari berria: "gazette"-a.

GEMen aldizkari berria salgai

Aldizkari honetan hainbat edukik dute tokia: elkarrizketak, erakusketen berri, Garazi En Rose ekitaldiaren kronika, sukaldaritza-errezetak, jokoak, origami, horoskopoak eta gehiago. 5,50 eurotan salduko da GEMen egoitzan, baita Liburu Prentsan eta Menta liburu-dendan ere. Urriaren 14ko zine-debate egunean ere eskuragarri izanen da.

« Emazteen alkoholismoaz » zine-debatea urriaren 14an Donibane Garazin

Alkoholismoa gai konplexua da, eta emazteen alkoholismoa oraindik ere isilpean gelditzen da ardura. Horren inguruko hausnarketa sustatzeko, « Des jours meilleurs » izeneko filma proiektatuko da lehenik, eta ondoren mahain-ingurua izanen da profesionalekin. Hortan parte hartuko dute:

• Vergnaud medikua, Garaziko CMPko psikiatra, bere taldearekin.

• Daguerre medikua, CSAPAko adikzioetan espezializatutako medikua.

• Alkoholiko Anonimoak eta Al-Anon elkarteetako kideak (familia eta lagunen sostengua eskaintzen dutenak).

Hitzordua: Urriaren 14an, 20:00etatik goiti, Donibane Garaziko Vauban zinema aretoan.

Harremanetarako: GEM egiturako Maider Goikoetxea: 06 45 31 80 78