Euskararen Urtaroaren karietara emanen du mintzaldia Ihitza Parot naturopatak, azaroaren 29an, Bardozeko zineman, 18:00etan. Burasoen buruhauste handienetarikoa izaten da apairuen prestaketa: zer eta nola presta, noiz, nolako elikagaiekin... Bada arranguratzekoa.

Preseski, Xarnegu ikastolak Ihitza Parot naturopata jinaraziko du eguneroko galdera horiei ihardesteko. Aipatuko du, hasteko, zer den elikadura orekatua, bai ere, konparazione, gosari eta atsalaskariek zer garrantzia duten haurren elikaduran, eta, denaren borobiltzeko, behatzerat joan den bakoitzak eramanen du besapean bere araberako menu-bilduma bat. Hala, ez da bakarrik entzuteko mintzaldia izanen, tailerra ere proposatuko baitu Parotek.